مانرضاش يخاصم القمر السما
مانرضاش تدوس البشر بعضها
مانرضاش...يموت جوا قلبي نداء
مانرضاش تهاجر الجزور ارضها
مانرضاش...قلبي جوا يغني ..الاجراس تدق لصرخة ميلاد
تمــــوت حتة مني...الاجراس بتعلن نهاية بشر من العباد
دي الحكمة قتلتني ..وحييتني...وخلتني أغوص ف قلب السر....قلب الكــــــــون..
قبل الطوفان ما يجيي..
وخلتني أخاف عليكي يا مصر واحكيلك على المكنون...
مين اللي عاقل فينا مين مجنون...
مين اللي مدبوح م الالم
مين اللي ظالم فينا مين مظلوم
مين اللي مايعرفش غير كلمة( نعم )..
مين اللي محنيلك خضار .....الفلاحين غلابة
مين اللي محنيلك عمار....... عمالك الطيابة
مين اللي بيبيع الضمير....ويشتري....ويشتري بيه الدمـــــــــــــــار
مين هو صاحب المسألة ...والمشكلة ....والحكاية والقلم
رأيت كل شئ....وتعبت على الحقيقة
قابلت ف الطريق ...عيون كتير بريئة
أعرف بشر.....عرفوني؟؟...لأ....لأ ماعرفونيش
قبـــــــــــــــــــــــــلوني ...وقبلتهم
بمد ايدي لك.....طب ليه ماتقبلنيش
لايهمني اسمك ...لايهمني عنوانك
لا يهمني لونك ولا ميلادك...مكانك
يهمني الانسان..ولو مالوش عنوان
يـــا ناس يا ناس يا مكبوتة ......هي دي الحدوتة
يـــا ناس يا ناس يا مكبوتة ......هي دي الحدوتة
حدوتة مصرية
إتفقت كافه القوي الوطنية في مصر علي
أن يكون
يوم 6 إبريل
يوم إضراب عام في مصر
يوم 6 إبريل
خليك قاعد في البيت أو شاركنا فى الميادين العامة
أوعي تنـــــــــزل لكن شاركنا
ماتروحشي الشغل
ماتروحشي الجامعه
ماتروحشي المدرسة
ماتفتحشي المحل
ماتفتحشي الصيدليه
ماتروحشي القسم
ماتروحشي المعسكر
عايزين مرتبات تعيشنا
عايزين نشتغل
عايزين تعليم لأولدنا
عايزين مواصلات أدمية
عايزين مستشفيات تعالجنا
عايزين دواء لأطفالنا
عايزين قضاء منصف
عايزين أمن وأمان
عايزين حرية وكرامه
عايزين شقق للعرسان
مش عايزين رفع أسعار
مش عايزين محسوبيه
مش عايزين ظباط بلطجية
مش عايزين تعذيب في الإقسام
مش عايزين أتاوات
مش عايزين فساد
مش عايزين رشاوي
مش عايزين إعتقالات
مش عايزين تلفيق قضايا
قول لأصاحبك مايروحوش الشغل همه كمان وخليهم يدخلوا الإضراب
) حزب العمل المصري- حركة كفاية - الإخوان المسلمين - حزب الكرامه - حزب الوسط - حركة موظفي الضرائب العقاريه - عمال غزل المحلة - حركة إداريي وعمال القطاع التعليمي - نقابة المحامين - حركة أستاذه الجامعات(
6أبريـــــــــــــــــل
أضراب عام في مصر سلمي
أبعت رسايل لخمسة من أصحابك
ولو كل واحد بعت لخمسة
في ظرف يومين البلد كلها حتعرف
بالموبايل
بالأرضي
بالأيميلات
أو حتي رسايل عالشات في قنوات التليفزيون
أنسخوا رسالتنا وأبعتوها تعليق على كل المقالات ألي بتقروها
بيكوا وبينا البلد دي حتتغير أنشاء الله
المسيحين مع المسلمين لصالح مصر
يالا يامحمد يالا يامينا مصر مش هتتغير إلا بإيــــدينـــــــا
متألق هنا وعلي الموقع كمان
ReplyDeleteالله عليك يا نجم
ReplyDeleteأنا ليه هعمل الاضراب ؟؟
لما الفسـاد وقــّـفوه حـارس على وطنى
ولهيب الغلا كوانى .. وحتّ ف بدنى
لما الحرامى سرق منى اللقمة والميه
وسرق هدوءى وسكنى .. حتى من سكنى
لما الحلم حتى اتسرق .. من يومى .. من زمنى
لما النظام نسج - فى عز الشباب - كفنى
أنا قلت هعلن العصيان
فى يوم حزين مـَدنى
انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم
لما سألت عالعيش .. قالوا مفيش
وقالو العيش على الأبونية
وسألت عالزيت .. وعزّيت
لما عرفت إن الزيت بتسعة جنيه
وسألت على حديد البُــنا
قالوا الحديد .. خلاص فى كرش البيه
انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم
لما البشر والحجر
ووادى النيل ببنى أدمينــــه
لما زمان الوطن بايامة وشهورة وسنينه
لما الصغير والكبير
قالوا كفاية مش عايزينــة
كفاية علينا حكم سنين
تخرج الواحـــــد من دينـه
انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم
لما المبيد صبح سرطان
يهرى ف ارضنا .. فى الزرع .. فى مواطن
لما بؤ الميه صبح وسخ داكن
لما خرب الاقتصاد .. واحد على تلـّـــهَ
قاعد وشارب وواكل وساكن
لما الشباب بيصرخ .. فى ذل ومهانة
ولا شغل ولا توظيف ولا شقة ومساكن
انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم
تحياتى
أحمد الصباغ